ئاژانسی كوردستان بۆ دەنگوباس
ئاژانسێكی نیشتمانیی سەربەخۆی هەواڵە

راپۆرتی: دڵشاد سەیفەدین.

سلێمانی 11ئادار/مارس(ئاكانیوز)- سەرۆكی كۆڕبەندی ئابووریناسانی كوردستان ڕای گەیاند شەڕى داهاتووى كورد لە بەغدا شەڕى سیاسى و ئابوورى دەبىَ نەك شەڕى یاسایى .

محەمەد كەریم ئەمڕۆ شەموو بەئاژانسی كوردستان بۆ دەنگوباس (ئاكانیوز)ی ڕاگەیاند "بەداخەوە لیست و قەوارە سیاسییەكان بەئۆپۆزسیۆن و دەسەڵاتەوە بۆ پەرلەمانى ئەمجارەى عێراق كاندیدى ناوداریان نییە لەڕووى ئابورییەوە و زیاتر كاندیدەكانیان كەسانى یاسایین".

هەروەها گوتى "ئێمە لە ماوەى هەڵمەتى بانگەشەى هەڵبژاردنەكاندا داوامان لە لیست و قەوارە كوردییەكان كردبوو بۆ ئەنجامدانى سیمینارێك بۆ كاندیدەكانیان، تا بزانن ڕۆڵیان چۆن بىَ لەڕووى ئابوورییەوە، بەتایبەت كە ئێمە كێشەى ئابووریى گەورەمان لەگەڵ حكوومەتى عێراقدا هەیە و تا ئێستە بیرى لێ نەكراوەتەوە، بەڵام بەداخەوە كەسیان ئامادەى ئەو سیمینارە نەبوون، لەبەرئەوەى كەسانى پسپۆڕیان نەبووە".

سەرۆكی كۆڕبەندی ئابووریناسانی كوردستان ئاماژەى بەوەش كرد "شەڕى ئێستەى كورد لە بەغدا تەنیا شەڕى سیاسى و یاسایى نییە، بگرە شەڕە ئابوورییەكە زۆر گەورەترە لە شەڕە سیاسى و یاساییەكەى كە ئەمان خۆیان بۆ ئامادە كردووە و زۆربەى كاندیدانیان لە ڕووى یاساییەوەیە، لە كاتێكدا شەڕى ئەمجارەى كورد لەبەغدا شەڕى سیاسى و ئابوورییە، نەك یاسایى".

عومەر عەلى كاندیدى لیستى یەكگرتووى ئیسلامیى كوردستان لە پارێزگەى سلێمانى لەوبارەیەوە بەئاژانسى كوردستان بۆ دەنگوباس(ئاكانیوز)ى ڕاگەیاند "ئەوە تا ڕادەیەك بەو شێوەیەیە و حزبە سیاسییەكان زیاتر ئەو كاندیدانەیان هەڵبژاردبوو كە جەماوەرین و كاریگەرییان بۆ سەر جەماوەر هەیە، نەك كەسانى پسپۆڕ لە بوارەكاندا".

هەروەها گوتى "لیست و قەوارە سیاسییەكان بەشێوەیەكى كەم گرنگییان بەكاندیدانى پسپۆڕى ئابوورى دابوو، ئێمە وەك لیستى یەكگرتوو لە سلێمانى خاوەنى 1كاندیدى پسپۆڕى بوارى ئابوورى بووین".

ئاماژەى بەوەش كرد "لەناو لیست و قەوارە سیاسییەكانى تریشدا كەسانى خاوەن بڕوانامەى ئابوورییان تێدابوو، بەڵام كەسانى خاوەن پسپۆِرى ئابوورییان نەبوو".

هەژێى گوتنە دوو لە كاندیدەكانی لیستی هاوپەیمانیی كوردستان بەپێی ئەوەی لە بانگەشەكانیاندا دیارە و بەپێی ئەنجامە بەرایییەكان یەكێكیان دەرچووە، پسپۆڕی بواری ئابوورین و تەنانەت دەرچووەكەیان بڕوانامەی دكتۆراشی لە بوارەكەدا هەیە.

ڕۆژى یەكشەمى ڕابردوو (7ئادار/مارس) دەنگدانی گشتی بۆ هەڵبژاردنی ئەنجوومەنی نوێنەرانی عێراق لە سەرتاسەری عێراق هاتە ئەنجامدان و تێیدا 6 هەزار و 172 پاڵاوكى لیستە بەشدارەكان كە هەزار و 803یان ئافرەتن كێبەركێیان لەسەر 325 كورسیی ئەنجوومەنى نوێنەران كرد كە 82 كورسییان بۆ ئافرەتانە، بڕیارە ئەمڕۆ كۆمسیۆنی باڵای سەربەخۆی هەڵبژاردنەكان بەڕەسمی ئەنجامە بەرایییەكان رابگەیەنێت.

(ئاكانیوز)