ئاژانسی كوردستان بۆ دەنگوباس
ئاژانسێكی نیشتمانیی سەربەخۆی هەواڵە

هەولێر 8 شوبات/فێبرایەر (ئاكانیوز)- لە نوێترین وریاییدا لەلایەن هێزە تەناهی و سەربازیییەكانی ئێران بۆ سەر خۆپێشاندەرانی ئەو وڵاتە لە هەمبەر خۆپێشادانی ڕۆژی 22ی بەهمەن، فەرماندەی سوپای پاسداران تایبەت بەتاران ڕای گەیاند كە بەتووندترین شێوە ڕووبەڕووی ئەو خۆپێشاندەران دەبینەوە كە دژی حكوومەتی ئێران هوتاف دەدەن.

بەپێی هەواڵێك كە لە ماڵپەڕی (ڕادیۆ فەردا)دا بڵاو كراوەتەوە، فەرماندەی سوپای پاسدارانی تاران وریایی دوا گوتی بەتووندترین شێوە ڕووبەڕووی ئەو كەسانە دەبینەوە كە بخوازن لەو ڕۆژەدا "دروشمی ئاژاوەگێڕانە" بلێن و لە كاروانی شۆڕشگێرانی كۆماری ئیسلامیی ئێران" بچنە دەرەە.

حوسێن هەمەدانی فەرماندەی سوپای تاران جەختی كردەوە كە هێزەكانی بەسیج و تەناهیپارێز ڕێگە نادەن بەهیچ شێوەیەك گرووپێك ئەو هەلە بۆ ئاژاوە گێڕی و گەمارۆدانی خۆپێشاندانەكە بقۆزنەوە.

هەژیی گۆتنە وریایی سوپای پاسدارانی تایبەت بەتاران بەدووەم وریایی لە ماوەی دوو هەفتەی ڕابردوودا دێت.

ئەوە لە كاتێكدایە كە لە چەند ڕۆژی ڕابردوودا میر حوسێن مووسەوی و مەهدی كەڕووبی هەر دوو سەركردەی بەرهەڵستكاری ئێران بەشێوەیەكی ڕەسمی داوایان لە خەڵك كردووە بەشداری ئەو ڕێپێوانە بكەن بەمەبەستی داواكردنی مافەكانیان لە دەسەڵاتدارانی ئەو وڵاتە.

لەلایەن خۆیەوە دوێنێ یەكشەم شیرین عیبادی وەرگری خەڵاتی نۆبڵی ئاشتی داوای لە خەڵكی ئێران كرد بەشێوەیەكی ئاشتیخوازانە و مەدەنیانە بەشداریی خۆپێشاندانەكەی ڕۆژی 22ی بەهمەن 31ەمین ساڵوەگەڕی سەركەوتنی شۆڕشی ئیسلامیی ئێران بكەن.

هەژیی گۆتنە عیبادی داوی لەخەڵك كرد بەشێوەیەكی هێمنانە و نەرم ونیان داواكرییەكانیان بخەن ڕوو بەهیچ شێوەیەك پاساوی گرتن نەدەنە دەست دەسەڵاتداران چونكە ئەوان دەخوازن خەڵك توندوتیژیی بنوێنن وبێكەنە پاساوێك بۆ جێبەجێ كردنی ئامانجەكانیان.

دێتە گۆتن كە دەسەڵاتدارانی ئێران بەشێوەیەكی ڕژد نیگەرانی هاتنەكایەی نائارامی و خۆپێشاندانن لە ڕۆژی 22ی بەهمەن كە دەكاتە 11ی ئەو مانگە.

(ئاكانیوز) گ ع