ئاژانسی كوردستان بۆ دەنگوباس
ئاژانسێكی نیشتمانیی سەربەخۆی هەواڵە

بەغدا 8 شوبات/فبرایەر (ئاكانیوز)- لە چوارچێوەى گەڕى حەوتەم لە قۆناخى یەكەمى خولى نایابى تۆپى پێى عێراق لە گرووپى باكور، لەو یارییەى كە ئەمڕۆ دووشەم لە لە یاریگەى دهۆك لە هەرێمى كوردستان بەڕێوە چوو، یانەى زاخۆ لە یانەى كەركووكى بردەوە.

سەباح قاسم ئەندامى لێژنەى ناوەندیى ناوبژیوانان لە دەستەى كاتیى بەڕێوەبردنى تۆپى پێىَ عێراق بەئاژانسى كوردستان بۆ دەنگوباس (ئاكانیوز)ى گوت "یانەى زاخۆ توانى سەركەوتنێكى گەورە مسۆگەر بكات، كاتێك بەئەنجامى (2-0) لە یانەى كەركووكى مێوانى بردەوە".

قاسم ڕوونى كردەوە "گۆڵەكانى یانەى زاخۆ لەلایەن هەریەك لە یاریزانان بیرۆل جیار لە خولەكى 5ى گێمى یەكەم و ساڵح جابر لە خولەكى 13ى ئەو گێمەدا تۆمار كران و گێمى یەكەم بەو ئەنجامە بەكۆتا هات".

هەروەها گوتى "لە گێمى دووەمدا هەردوو تیپ نەیانتوانى گۆڵ لە یەكتر تۆمار بكەن و یارییەكە بەدوو گۆڵى خاوێن لە بەرژەوەندیى یانەى زاخۆ بەكۆتا هات".

ئاماژەى بەوەش دا "یارییەكە لە یاریگەى دهۆك و بەبىَ ئامادەبوونى جەماوەرى زاخۆ بەڕێوە چوو، بەهۆى سزادانى یانەكە لەلایەن دەستەى كاتییەوە، ئەمەش دواى كارە ئاژاوەگێڕییەكانى ئەو دوایییە لە كاتى یاریى نێوان یانەى زاخۆ و جەوییە لە گەڕى پێنجەمى كێبەركێكەدا".

یانەى زاخۆ كە لەلایەن ڕاهێنەر وەلید زەهەدەوە ڕابەرایەتى دەكرىَ، بەم بردنەوەیە كۆى خاڵەكانى خۆى گەیاندە 10 خاڵ، لە كاتێكدا كۆى خاڵەكانى یانەى كەركووك كە لەلایەن ڕاهێنەر دارەوان قادرەوە ڕابەرایەتى دەكرىَ، لە 4 خاڵ مایەوە.

و: ر م