ئاژانسی كوردستان بۆ دەنگوباس
ئاژانسێكی نیشتمانیی سەربەخۆی هەواڵە

سلێمانى 14 ئادار/مارس (ئاكانیوز)- بەرپرسی پێوەندییەكانى دەرەوەى پارتی كرێكارانی كوردستان "پەكەكە"ڕای گەیاند ئاسایشى سلێمانى ڕێگرى كردووە بۆ كۆكردنەوەى كۆمەك بۆ كەناڵى ڕۆژ تیڤى، ئاسایشى سلێمانیش دەڵێ ئەوان مۆڵەتى یاسایییان نەبووە.

ئەحمەد دەنیز ئەمڕۆ یەكشەم لە لێداونێكی ڕۆژنامەوانیدا ئاشكراى كرد "دوای ئەوەی پۆلیسی بەلجیكا هێرشیان كردە سەر كەناڵی ئاسمانی ڕۆژ تیڤی و زیانێكی مادیی زۆریان بەئامێر و كەلوپەلی پەخشی ئەو كەناڵە گەیاند، لە بەرامبەردا بۆ كۆمەككردنی ئەو كەناڵە، كوردستانیان لەهەر چوار پارچەكە و وڵاتانی ئەوروپا دەستیان بەكۆكردنەوەی كۆمەك كردووە".

هەروەها گوتى "بەڵام لە سلێمانی ئاسایشی ئەو شارە ڕێگەیان لێگرتن و نەیان هێشت ئەو هەڵمەتە بێتە ئەنجام دان، بۆیە ئێمە سەرەڕای نیگەرانیمان لە بەرامبەر ئەو هەڵوێستەی ئاسایشی سلێمانی زۆر بەتوندی ئەو هەڵوێستەی ئاسایش سەركۆنە دەكەین".

دەنیز ئاماژەى بەوەش دا "بەهۆی ئەو هێرشەی كراوەتە سەر ڕۆژ تیڤی، ئەو كەناڵە ئێستە ناتوانێت بەگوێرەی داخوازییەكانی بینەرانی بەرنامەكانی پێشكێش بكات، لەبەر ئەوە ئێستە بینەرانی و لایەنگرانی دەستیان كردووە بەكۆكردنەوەی كۆمەك، چونكە لەكاتی هێرشیپۆلیسی بەلجیكا بۆ سەر ئەو كەناڵە زیاتر لە1ملیۆن و 200 هەزار یۆرۆ زیان بەكەناڵەكە گەیشتووە".

قادر حەمەجان بەڕێوەبەرى گشتیی ئاسایشى سلێمانى لاى خۆیەوە بۆ (ئاكانیوز) گوتى"ئەوان نەهاتوون بەشێوەیەكى یاسایى ئەو هەڵمەتە ئەنجام بدەن و داوایان لە لایەنى حكوومەتى نەكردووە بۆ ئەنجامدانى ئەو هەڵمەتە".

حەمەجان گوتى "بۆ سازكردنى هەر خۆپیشاندان و هەڵمەتێك پێویستە سەرەتا مۆڵەتى بۆ وەربگرن و لەلایەن هێزەكانى تەناهییەوە ڕێگەیان پێ بدرێ".

كەناڵی ڕۆژ تیڤی كەناڵێكی ئاسمانی كوردی سەر بەپارتى كرێكارانى كوردستانە و ساڵانێكی زۆرە پەخشی بەرنامەكانی لە هەردوو وڵاتی بەلجیكا و ئەڵمانیاوە بۆ بینەرانی پێشكێش دەكات و چەند ڕۆژێك بەر لە ئێستە لەلایەن پۆلیسی بەلجیكاوە هێرش كرایە سەر ستۆدیۆی بەلجیكا و ئێستە ئەو كەناڵە لە وڵاتی ئەڵمانیاوە بەرنامەكانی پەخش دەكات.

(ئاكانیوز) د س