ئاژانسی كوردستان بۆ دەنگوباس
ئاژانسێكی نیشتمانیی سەربەخۆی هەواڵە

هەولێر 8 شوبات/فێبرایەر (ئاكانیوز)- سەرۆكی دیوانی سەرۆكایەتیی هەرێمی كوردستان ڕای گەیاند سبەی سێشەم سەرۆكی هەرێمی كوردستان بۆ خستنەڕووی ئاكامی سەردانەكەی بۆ هەر یەك لە وڵاتە یەكگرتووەكانی ئەمەریكا و نەمسا لەگەڵ سەرۆكایەتیی پەرلەمان و حكوومەتی هەرێم كۆ دەبێتەوە.

فوئاد حوسێن ئەمڕۆ دووشەم بەئاژانسی كوردستان بۆ دەنگوباس (ئاكانیوز)ی ڕاگەیاند "سبەی سێشەم مەسعوود بارزانی سەرۆكی هەرێمی كوردستان لەگەڵ هەر یەك لە سەرۆكایەتیی پەرلەمان و سەرۆكی سەرجەم فراكسیۆنەكانی پەرلەمان و حكوومەتی هەرێم كۆ دەبێتەوە".

هەروەها گوتی "لە كۆبوونەوەكەدا سەرۆكی هەرێمی كوردستان ئاكام و ئامانجەكانی سەردانەكەی بۆ وڵاتە یەكگرتووەكانی ئەمەریكا و وڵاتی نەمسا دەخاتەڕوو".

سەرۆكی هەرێم دواى ئەوەى بەڕەسمی لەلایەن باراك ئۆبامای سەرۆكی وڵاتە یەكگرتووەكانی ئەمەریكا بانگهێشتن كرا بۆ سەردانی ئەو وڵاتە، دواى ئەنجامدانی سەردانەكەش ڕۆژى 25 كانوونی دووەم/یەنایەرى ڕابردوو مەسعوود بارزانی و باراك ئۆباما كۆبوونەوەیەكییان ساز كرد و باسیان لە دۆخی سیاسی هەرێمی كوردستان و عێراق و هەڵبژاردنی ئەنجوومەنی نوێنەرانی عێراقی كرد.

ڕۆژى 29 كانوونی دووەم/یەنایەری ڕابردوو بارزانی لە درێژەى گەیشتەكەیدا گەیشتە نەمسا و لە 3 ئەو مانگە (شوبات/فێبرایەر) لەگەڵ سەرۆكی نەمسا ئامادەى ئاهەنگێكی هونەرمەندی كورد شڤان پەروەر بوون.

(ئاكانیوز) ف خ