ئاژانسی كوردستان بۆ دەنگوباس
ئاژانسێكی نیشتمانیی سەربەخۆی هەواڵە

هەولێر 8 شوبات/فێبرایەر (ئاكانیوز)- بەرپرسی پێوەندییە جەماوەرییەكانی كۆمیسیۆنی باڵاى هەڵبژاردنەكان ئاشكراى كرد، كۆمیسیۆن ناوی هیچ پاڵاوكەیەك ئاشكرا ناكات تا كێشەی پالاَوكە دوورخراوەكان چارەسەر نەكرێ.

عەبدوڕەحمان خەلیفە ئەمڕۆ دووشەم بەئاژانسی كوردستان بۆ دەنگوباس (ئاكانیوز)ی ڕاگەیاند"بەپێی یاسایی كۆمیسیۆن ناوی سەرجەم پاڵاوكەكان بۆ هەر هەڵبژاردنێك بەیەك لیست و بەیەكەوە بڵاو دەكرێنەوە، بۆیە ئێستە ناوی هیچ پاڵاوكەیەك ئاشكرا ناكرێ تا كێشەی پاڵاوكە دوورخراوەكان چارەسەر نەكرێ".

ئاماژەی بەوەش دا "هۆكاری ئاشكرا نەكردنی ناوى پاڵاوكەكانی هەڵبژاردنی ئەنجوومەنی نوێنەرانی عێراق، بۆ یەكلا نەبوونەوەى كێشەی پاڵاوكە دوورخراوەكان دەگەڕێتەوە، چونكە بەپێی یاسایی كۆمیسیۆن و یەكێك لە بنەما سەرەكییەكان، دەبێ پێوەی پایەند بین ڕەچاوكردنی یەكسانییە لە نێوان سەرجەم پاڵاوكەكان".

خەلیفە لە درێژەى لێدوانەكەیدا گوتی "ئاشكراكردنی ناوى هەندێ پاڵاوكە و دواتر ئاشكراكردنی هەندێكی تر كاتی یەكسان بەپاڵاوكەكان نادات بۆ پڕوپاگەندە كردن".

دەستەی لێپرسینەوە و دادپەروەری لە 8 كانوونی دووەم/یەنایەر بەتۆمەتی بەعسیبوون ڕێگەى لە 511 كاندید و 11 قەوارەى سیاسی گرت بەشدارى لە هەڵبژاردنی داهاتووی ئەنجوومەنی نوێنەران بەكەن، كە بڕیارە لە 7 ئادار/مارسی داهاتوو بێتە ئەنجامدان.

ڕۆژى 3 ئەو مانگە (شوبات/فێبرایەر) دەستەی پێداچوونەوە بڕیاری هەڵوەشاندنەوەی بڕیارەكەى دەستەى لێپرسینەوە و دادپەروەرى لەبارەى دوورخستنەوەى 511 كاندید و 11 قەوارەى سیاسی لە هەڵبژاردنەكان بەتۆمەتی بەعسیبوون، ڕەت كردەوە و كاتی لێپێچینەوەى ڕابردووى قەوارە سیاسییەكانی بۆ دوای هەڵبژاردن دوا خست.

(ئاكانیوز) ف خ