ئاژانسی كوردستان بۆ دەنگوباس
ئاژانسێكی نیشتمانیی سەربەخۆی هەواڵە

سلێمانی 15 ئادار/مارس (ئاكانیوز)- سەرچاوەیەك لە وەزارەتى ئەوقاف و كاروبارى ئاینیی حكوومەتى هەرێمى كوردستان ڕای گەیاند 3 كۆمپانیای تری تایبەت بەگەشتی عومرە مۆڵەتی رەسمی گواستنەوەی عومرەكارانیان لە وەزارەتی ئەوقاف وەرگرت.

مەریوان نەقشبەندى گوتیار و بەڕێوەبەرى ڕاگەیاندنى وەزارەتى ئەوقاف و كاروبارى ئاینى حكوومەتى هەرێمى كوردستان ئەمڕۆ دووشەم بەئاژانسى كوردستان بۆ دەنگوباس (ئاكانیوز)ى راگەیاندن "دوای ئەوەی هەفتەی رابردوو وەزارەتی ئەوقاف مۆڵەتی رەسمی بە 3 كۆمپانیای عومرە دا، تا لە هەرێمی كوردستانەوە ئەو كەسانەی دەیانەوێ گەشتی عومرە بكەن بگوازنەوە بۆ سعوودیە، ئەمڕۆ بەهەمان مەبەست وەزارەتی ئەوقاف مۆڵەتی بە 3 كۆمپانیای تر دا".

نەقشبەندى گوتى كۆمپانیاكان برێتین لە "كۆمپانیای زمزم و شەفاعە لە شاری هەولێر و پاڕەزان لە شاری سلێمانی".

ئێستە ژمارەی ئەو كۆمپانیایانەی مۆڵەتی گواستنەوەی عومرەكارانیان لە هەرێمی كوردستانەوە بۆ سعوودییە وەرگرتووە گەیشتووەتە 6 كۆمپانیا، دوویان لە سلێمانی و چواریان لە هەولێرن.

لە لێدوانێكى پێشترى بۆ ئاژانسى كوردستان بۆ دەنگوباس (ئاكانیوز) مەریوان نەقشبەندى ڕای گەیاندبوو "بەپێى ئەو مەرجانەى بۆ كۆمپانیاكانى عومرە دیارى كراوە پێویستە ئەم ساڵ هەزار و 50 دۆلارى ئەمەریكایی لە هەر كەسێك وەربگرن كە لە هەرێمی كوردستانەوە بۆ عومرە دەچنە سعوودیە".

ساڵانە ژمارەیەكى زۆر لە مسوڵمانانى دنیا بەمەبەستی ئەنجامدانی گەشتی ئاینی عومرە سەردانی ماڵى خوا لە سعوودیە دەكەن.

(ئاكانیوز) خ ن