ئاژانسی كوردستان بۆ دەنگوباس
ئاژانسێكی نیشتمانیی سەربەخۆی هەواڵە

هەولێر 10 ئادار/مارس (ئاكانیوز)- ئەمڕۆ چوارشەم لە دیوانى پارێزگەى هەولێر گرێبەستى پێدان و وەرگرتنى تەلاری ئەنستیوتی شوێنەوارناسی عێراق لە نێوان هەریەك لە نەوزاد هادى پارێزگار و براین لیۆن نوێنەرى سەنتەرى ئاوەدانكردنەوەى نێودەوڵەتىIRD و سارە میركادۆ نوێنەرى تیمى ئاوەدانكردنەوەى هەرێمى RRT ئیمزا كرا.

ئەو گرێبەستە برێتیی بوو لە دامەزراندنى پرۆژەیەكى هاوبەش بۆ ئەنستیوتى شوێنەوارناسی عێراق لە شارى هەولێر كە بەپاتی پازدە ملیۆن و 500 هەزار دۆلارى ئەمەریكایى بەهاوبەشی لە نێوان ئەمەریكا و حكوومەتى هەرێمى كوردستان دامەزراوە، بۆ خزمەتى شوێنەوارناسی و پاراستنى دۆزراوە شوێنەوارییەكان و ناساندن و شیتەڵكردنەوەیان لە رووى تەمەن و تایبەتمەندیانەوە. راگەیاندنی پارێزگەی هەولێر بەئاژانسی (ئاكانیوز)ی راگەیاند.

زیاتر گوتی "بەشێكی تری كاری ئەو ئەنستیوتە راهێنانى كادرانى شوێنەوارناسانى عێراقە كە لەلایەن هەریەك لە سەنتەرى ئاوەدانكردنەوەى نێودەوڵەتى IRD و تیمى ئاوەدانكردنەوەى هەرێمیی RRTى ئەمەریكایى بۆ ماوەى ساڵێك بەرێوەدەچێت و دواتر رادەستى حكوومەتى هەرێمى كوردستان دەكرێتەوە".

"كردنەوەى ئەو ئەنستیوتە كە گرینگترین و تازەترین سەنتەرى تۆژینەوەى زانستى شوێنەوارناسییە لە عێراق بایەخێكى گەورەى دەبێت بۆ پرۆژەى پەرەپێدانى قەڵاى هەولێر و كارەكانى ترى پشكنین و گەڕان بەدواى شوێنەوار و لێكۆڵینەوەى شوێنەوارناسى و راهێنانى شوێنەوارناسان لەسەر چۆنیەتى پشكنین و پاراستنى دۆزراوە مێژووییەكان بەتازەترین تەكنەلۆجیا و شێوازى سەردەمیانە. سەرچاوەكە گوتی

دامەزراندنى ئەنستیوتى پاراستنى شوێنەوارەكانى عێراق لەبەر رۆشنایى ئەو یاداشتنامە هات كە نێچیرڤان بارزانى سەرۆكى كابینەى پێنجەمى حكوومەتى هەرێمى كوردستان و حكوومەتی ئەمەریكا ئیمزایان كربوو.

(ئاكانیوز) س س