ئاژانسی كوردستان بۆ دەنگوباس
ئاژانسێكی نیشتمانیی سەربەخۆی هەواڵە

سلێمانی 8 شوبات/فێبرایەر (ئاكانیوز)- دواى نیوەڕۆى ئەمڕۆ دووشەم لە هۆلى تەوارى شارى سلێمانى بەئامادەبوونى سەرمایەكاران و پسپۆرانى بوارى پەروەردە، لقى سلێمانى یەكەتیى قوتابییانى كوردستان كۆنفڕانسێكى بۆ دامەزراندنی سندووقێكی دراو بۆ خوێندكارە كەمدەرامەتەكان و هان دانی سەرمایەكاران بۆ دروست كردنی قوتابخانە و دایەنگە، سازكرد

سەلمان محەمەد بەرپرسى لقى سلێمانى یەكەتیى قوتابییانى كوردستان بەئاژانسی كوردستان بۆ دەنگوباس (ئاكانیوز)ى ڕاگەیاند "ئامانجى سازادانى ئەو كۆنفڕانسە هاندانى سەرمایەكاران و خاوەن كۆمپانیاكانە، بۆ ئەوەى هاوكاریی كەرتی پەروەردە و خوێندنی هەرێم بكەن".

هەروەها گوتی "ئێمە هەوڵ دەدەین سەرمایەكاران هان بدەین، تا دایەنگە و باخچەى ساوایان و قوتابحانە لە ناوچە جیا جیاكانی هەرێم دروست بكەن، ئەمەش سوودی دەبێ بەرەو پێشبردنی پەروەردە و خوێندنی هەرێمی كوردستان".

ئاماژەى بەوەش دا "لە كۆنفڕانسەكە پرۆژەى دامەزراندنى سندووقێكى دراو بۆ هاوكاریی كردنى قوتابییە كەمدەرامەتەكان، خرایە بەردەم سەرمایەكاران".

كۆنفڕانسەكە 2 ڕۆژ دەخایەنێ و تێیدا چەند بابەتێكى پێوەندار بەپرۆژەیە پێشكێش دەكرێ، بڕیارە لە كۆتایی كۆنفڕانسەكە بڕیار و ڕاسپاردەكانی كۆنفڕانسەكە پێشكێشی پەرلەمان و وەزارەتی پەروەردەى هەرێم بكرێ.

(ئاكانیوز) ن م