ئاژانسی كوردستان بۆ دەنگوباس
ئاژانسێكی نیشتمانیی سەربەخۆی هەواڵە

هەولێر 14 ئادار /مارس (ئاكانیوز)- هاووڵاتییانی بەشداربوو لە پێشانگەی جلوبەرگ لە پێشانگەى نێودەوڵەتی هەولێر ڕای دەگەیەنن كە نرخی جلوبەرگ لە پێشانگەكەدا گرانە و بەتاكیش نافرۆشرێ.

ئارام محەمەد هاووڵاتی لە ناو پێشانگەكە بەئاژانسی كوردستان بۆ دەنگوباس (ئاكانیوز)ی ڕاگەیاند "ئێمە هاتووین، بۆ ئەوەی ئەو جلوبەرگانەی پێویستمانە و ئارەزووی دەكەین بیكڕین بەنرخێكی گونجاو، بەڵام جلوبەرگ لە پێشانگەكەدا زۆر گرانترە لە بازاڕ".

ئەڤین عەبدوڵا، هاووڵاتی بەشدار لە پێشانگەكە بۆ (ئاكانیوز) گوتی "هاووڵاتی ناتوانێ جلوبەرگ لەو پێشانگایەدا بكڕێ، چونكە بۆ هەر لایەكی ئەم پێشانگەیە دەچیت و دەست لەسەر پارچەیەكی جلوبەرگ یان هەر شتێكی دادەنێیت پێت دەڵین بەتاك بۆ فرۆشتن نابێت، تەنیا بە كۆمەڵ دەبێ، هیچ هاووڵاتییەكیش ئامادە نییە بەكۆمەڵ شت بكڕێت، تەنیا خاوەن دووكانەكان نەبن".

ئیبراهیم ئوروت نوێنەرى یەكێك لە كۆمپانیاكانی جلوبەرگ لەوبارەیەوە بۆ (ئاكانیوز) ئاشكراى كرد "ئێمە ناتوانین پێداویستیەكان بەتاك بفرۆشین، چونكە چەند تاكێك بەهاووڵاتییان بفرۆشین، ڕەنگە ئەوانی تر بمێننەوە بەو شێوەیەش سێتی جلوبەرگ و پێداویستیەكان تێك دەچێ".

ئەمڕۆ یەكشەم لە پێشانگەی نێودەوڵەتیی هەولێر لە یەك كاتدا 2 پێشانگە كرانەوە، یەكەمیان تایبەت بوو بەپێشاندانی جلوبەرگ كە 63 كۆمپانیا بەشدارییان تێیدا كرد و دووەمیان تایبەت بوو بەكەلوپەلی پیشەسازی كە زیاتر لە 80 كۆمپانیا لە وڵاتانی توركیا، میسر ، سووریا و شارەكانی تری عێراق تێیدا بەشداربوون.

(ئاكانیوز) ع س