ئاژانسی كوردستان بۆ دەنگوباس
ئاژانسێكی نیشتمانیی سەربەخۆی هەواڵە

هەولێر 14 ئادار/مارس (ئاكانیوز)- ئەمڕۆ یەكشەم 27ەمین پێشانگەی نێودەوڵەتیی بۆ جلوبەرگ و كەلوپەلی پیشەسازی بەبەشداری 155 كۆمپانیا لە وڵاتی جیاجیاوە لەسەر خاكی پێشانگەی نێودەوڵەتیی هەولێر كرایەوە.

لە رێورەسمی كردنەوەدا جگە لە بەرپرسی فەرمانگەی پێوەندییەكانی دەرەوە و وەزیری بازرگانی و پیشەسازی حكوومەتی هەرێمی كوردستان، كونسوڵی گشتیی توركیا لە هەولێر و چەندان بازرگان و خاوەن كۆمپانیا ئامادە بوون.

لە پێشانگەی نێودەوڵەتیی هەولێر ئەمڕۆ لە یەك كاتدا دوو پێشانگەی تێدا كرایەوە، پێشانگەی یەكەم تایبەت بوو بەجلوبەرگ كە 63 كۆمپانیای توركیایی جلوبەرگیان تێدا پێشان دەدا، پێشانگەی دووەمیش تایبەت بوو بەكەلوپەلی پیشەسازی كە زیاتر 80 كۆمپانیا تێیدا بەشدار بوون، كە لە وڵاتانی توركیا، میسر، سووریا و شارەكانی تری عێراقەوە هاتبوون.

دوای كردنەوەی پێشانگەكە لەلایەن كۆمپانیای پامیراس پێشاندانی جلوبەرگ پێشكێش كرا كە تێیدا تازەترین شێوازی جلوبەرگ پێشان درا.

لەتیف عارف بەڕێوەبەری پێشانگەی نێودەوڵەتیی هەولێر بەدەزگەكانی ڕاگەیاندن لە ناویاندا ئاژانسی (ئاكانیوز)ی راگەیاند "ئەو پێشانگەیەی ئەمڕۆ 27ەمین پێشانگەیە كە لەسەر خاكی پێشانگەی نێودەوڵەتیی هەولێر دەكرێتەوە كە بەگشتیی 155 كۆمپانیا لە چەندان وڵاتی جیاجیاوە تێیدا بەشدارن".

زیاتر گوتی "بەگشتیی لە كاتی كردنەوەی پێشانگەكاندا پێشوازیەكی زۆر هەیە لەلایەن هاووڵاتییانەوە".

(ئاكانیوز) ر ح