ئاژانسی كوردستان بۆ دەنگوباس
ئاژانسێكی نیشتمانیی سەربەخۆی هەواڵە

هەولێر 13 ئادار/مارس (ئاكانیوز)- بەریتانیا و فرەنسا، تۆمەتی ئەوە دەخەنە پاڵ ئەمەریكا كە گوایە بەمۆركردنی گرێبەستێكی گەورەی ئابووری و دارایی پاڵپشتی یەك لایەنە و ڕاستەوخۆی لە كەرتی پیشەسازیی هێزی ئاسمانیی خۆی كردووە.

تۆڕی هەواڵی (بی.بی.سی) ئەمڕۆ شەموو لەوبارەیەوە بڵاوی كردەوە، پاش ئەوەى سەرەتاكانی هەفتەى ڕابردوو زنجیرە كۆمپانیایەكی ئەوروپایی ڕەتیان كردەوە لە پرۆژەى گەیاندنی وزە بۆ هێزە ئاسمانییەكانی ئەمەریكادا بەشدار بن، وەزارەتی بەرگریی ئەمەریكایان بەوە تۆمەتبار كرد كە ئەو وڵاتە گرینگی زیاتر بەكۆمپانیای بۆینگی ئەمەریكایی دەدات بۆ ئەوەى پرۆژەكە جێبەجێ بكات و پاوانخوازیی كردووە.

نیكۆلا ساركۆزی سەرۆكی فرەنسا ڕای گەیاند "پێویستە ئەمەریكا لە نەهێشتنی پاڵپشتییە ڕاستەوخۆكانی حكوومەت بۆ كەرتی تایبەت پێشڕەو بێت، بەڵام ئێستە خۆی بووەتە لایەنێكی ئابووری و بازرگانیی كەرتی تایبەت، چونكە دەبێ ئەمەریكا بەرژەوەندییەكانی دۆستانی ئەوروپایی خۆی لەبەرچاو بگرێ".

لای خۆیەوە گۆردن براون سەرۆك وەزیرانی بریتانیا وێڕای دەربڕینی نیگەرانییەكانی لەوبارەیەوە گوتی "ئێمە بڕوامان بەبازرگانیی ئازاد هەیە و ڕێز لە ڕكابەریی بازرگانیی ئازاد دەگرین".

وەزارەتی بەرگریی ئەمەریكا هەرجۆرە پاڵپشتییەكی ڕاستەوخۆ و دەستوەردانی حكوومەتی لە ڕكابەریی كۆمپانیاكان ڕەت كردەوە و ڕای گەیاند "ئێمە ڕێز لە كەرتی پیشەسازیی بەرگریی ئەوروپا دەگرین".

هەژیی گۆتنە، بەپێی یاسا و ڕێنوێنییەكانی بازرگانیی ئازاد، ڕۆڵی حكوومەت لە كەرتی تایبەتدا تەنیا پاڵپشتیی ناڕاستەوخۆ و یارمەتیدانی گشتگیر بۆ هەمووانە، ڕكابەریی لایەنەكان لەسەر بنەمای چۆنیەتی كاڵا و بەرهەمەكان مەرجی سەرەكییە و بەپێوەر دێتە دانان.

(ئاكانیوز) هـ ب