ئاژانسی كوردستان بۆ دەنگوباس
ئاژانسێكی نیشتمانیی سەربەخۆی هەواڵە

سلێمانى 8 ى شوببات/ فیبرایەر(ئاكانیوز) - بەڕێوەبەرى گشتى گەشتوگوزارى هەولێر ئاشكرای كرد وەزارەتی شارەوانیی و گەشتوگوزارى هەرێم ڕەزامەندی لەسەر ماستەرپلانی گەشتەوەرى هەرێم دەربڕیووە، دواى پەسند كردنی بودجەى 2010 ئەو پرۆژەیە دەست بەجێبەجێ كردنی دەكرێ.

مەولەوى جەبار ئەمڕۆ پێنجشەم بەئاژانسى كوردستان بۆ دەنگوباس (ئاكانیوز)ى ڕاگەیاند "ماوەیەك بەر لە ئێستە بەبەشداربوونى چەندان پسپۆرى گەشتیارى و ئابوورى نەخشەرێى گەشتیارى هەرێممان داڕشت و تیێیدا ئەوەمان دیارى كرد كە پێویستە ئێمە لە داهاتوودا چۆن و لەسەر چى پڕۆژەى گەشتیارى جێبەجآ بكەین".

هەروەها گوتى "لەبەر ئەوەى ئەو نەخشەرێیە پێویستى بەبوونى ماستەرپلانى گەشتیارى هەبوو، بۆیە لەگەڵ ئەو نەخشەرێیەمان داواكارى جێبەجێكردنى ماستەرپلانى گەشتیاریمان پێشكێشی وەزارەتى شارەوانى هەرێم كرد".

ئاماژەى بەوەش دا "ئێستە وەزارەتى شارەوانى ڕەزامەندى لەسەر ئەو نەخشەرێیە و جێبەجىَ كردنى ماستەرپلانى گەشتیارى هەرێم دەربڕیووە و بڕیارە لە دواى تەرخانكردنى بودجە بۆ وەزارەتى شارەوانى ئەو پرۆژەیە دەستی پێ بكرێ".

جەبار ئەوەشی گوت "بەجێبەجێبوونى ئەو ماستەرپلانە ئێمە دەزانین كە كوىَ بۆ ئەنجامدانى پرۆژەى گەشتیارى گرینگە و پێویستمان بەچەند هۆتێل و پێَداویستى ترى بوارى كەرتى گەشتیارى دەبێ، ئەمەش دەبێتە هۆى زیادبوونی ڕیژەى گەشتەوەران بۆ هەرێم و بەهێزبوونی سەرچاوەى داهاتی هەرێم.

(ئاكانیوز) د ا