ئاژانسی كوردستان بۆ دەنگوباس
ئاژانسێكی نیشتمانیی سەربەخۆی هەواڵە

هەولێر 11 ئادار/مارس (ئاكانیوز)- میخائیل سیمیۆنۆڤیچ لازارێف پرۆفیسۆر لە بواری مێژوو و هەروەها یەكێك بوو لە كوردناسە بەناوبانگەكانی رووسیا لە تەمەنی 80 ساڵیدا كۆچی دواییی كرد .

لازارێف ساڵی 1930 لە مۆسكۆ لە دایك بووە، لە سەردەمی یەكەتیی سۆڤیەتدا مێژووی خوێندووە، ساڵی 1956 بڕوانامەی دكتۆرای لە مێژوو بەپلەیەكی باش بەدەست هێناوە، هەروەها وەك مامۆستا لە زانكۆی مۆسكۆ كاری كردووە و سەرپەرشتیاری زۆر لەو پڕۆژانە بووە كە لە ناوچەی رۆژهەڵاتدا ئەنجام دراون.

لازارێف لە كتێبەكەی "كوردستان و پرسی كورد 1923-1945" زۆر بەزانستییانە باسی كوردی كردووە، ئەو كتێبە تەواوكەری كتێبەكانی تریەتی وەك"كوردستان و گرفتی كوردستان" دۆزی كورد لە نێوان 1891-1917) و "ئیمپریالیزم و دۆزی كورد 1917-1923).

دكتۆر مارف خەزنەدار وەك وەبیرهێنانەوەیەك گوتی "لازەریف یەكێكە لە زانا هەرە پێشكەوتووەكانی رووسیا كە وازی لە نووسین لەبارەی كوردەوە نەهێناوە، بەتایبەت كتێبەكەی "كورد و كوردستان" چەندان جار لە رووسیا چاپ كرایەوە و چەندان جار هەندێ دەستكاری و چاككاری تێدا كرد، ئەم كتێبە یەكێكە لە كتێبە نایابەكانی وەك سەرچاوەیەكی گرینگ لەسەر كورد تەماشا دەكرێت".

لەم ساڵانەی دواییدا چەندان جار میخائیل لازارێف سەردانی پایەتەختی هەرێمی كوردستانی كردووە و پێوەندیی لەگەڵ مێژوونووسانی كورد دامەزراندووە، دكتۆر مارف خەزنەدار بەبۆنەی كۆچی دواییی لازارێفەوە بڕیاری دا پێوەندیی بەماڵباتی ئەم مێژوونووسەوە بكات و سەرەخۆشییان لێ بكات.

(ئاكانیوز) س ح