ئاژانسی كوردستان بۆ دەنگوباس
ئاژانسێكی نیشتمانیی سەربەخۆی هەواڵە

هەولێر 11 ئادار/مارس (ئاكانیوز)- لێژنەی مافی مرۆڤی سەر بەنەتەوە یەكگرتووەكان خەریكی دەركردنی بڕیارێكە بۆ ئەوەى ڕەخنە لە یاسای تایبەت بەقەدەخەكرانی دروستكردنی منارەی مزگەوت لە سویسرا بگرێ.

تۆڕی هەواڵی (پرێس) ئەمڕۆ پێنجشەم بڵاوی كردەوە، پێشنووسی ئەو بڕیارە كە لەسەر پێشنیازی وڵاتاتی ئیسلامی بووە، ڕەخنە لە بڕیارێكی نوێی حكوومەتی سویسرا دەگرێت كە ڕێگەی لە دروستبوونی منارەی مزگەوت گرتووە.

نەتەوە یەكگرتووەكان ڕای گەیاند "بڕیاری لەو شێوەیەى سویسرا، ئاماژە بەترس لە ئیسلام دەكات كە دوورە لە بنەماكانی مافی مرۆڤ و زیان بەئازادیی بیروڕا دەگەیەنێت، جگە لەوەى پەرە بەهەڵاواردنی ڕەگەزی دەدات و لەوانەیە ئەنجامی نەخوازراوی لێ بكەوێتەوە".

بەپێی سەرچاوەكە، كۆتای ئەم مانگە (ئادار/مارس) بڕیارەكەى نەتەوە یەكگرتووەكان لە كۆبوونەوەى لێژنەی مافی مرۆڤی سەر بەڕێكخراوەكە دەخرێتە دەنگدانەوە.

سویسرا ئێستە نێزیكەى 400 هەزار مسوڵمانی لە خۆ گرتووە كە دەكاتە ڕێژەى 5%ی كۆی دانیشتووانی ئەو وڵاتە، هاوكات نێزیكەى 150 مزگەوت و شوێنی نوێژكردن لەو وڵاتەدا هەیە.

هەژیی گۆتنە، بەپێی ڕاپرسییەك لە سویسرا 57%ی خەڵك داوای ڕاگرتنی دروستكردنی مزگەوت لە وڵاتەكەیان كرد، هاوكات پێوەندییەكان سویسرا و لیبیا ساڵی 2008 پاش گرتنی كوڕی قەزافی لە هۆتێلێكی سویسرا بەرەو ئاڵۆزی ڕۆیشت كە بەتۆمەتی هەڵسوكەوتی خراپ لەگەڵ كارمەندانی هۆتێلەكە هاتبووە گرتن.

(ئاكانیوز) هـ ب