ئاژانسی كوردستان بۆ دەنگوباس
ئاژانسێكی نیشتمانیی سەربەخۆی هەواڵە

هەولێر 8 شوبات/فێبرایەر (ئاكانیوز)- ئەكمەلەدین ئیحسان ئۆغڵو سەرۆكی ڕێكخراوی كۆنفرانسی ئیسلامی نیگەرانی خۆی بۆ دۆخی مسوڵمانان لە چەند وڵاتێكی ئەوروپایی خستە ڕوو.

بەپێی هەواڵێكی ئەمڕۆ دووشەمی تۆڕی دەنگوباسی (IRIBNews)، ئۆغڵو لە میسر ڕای گەیاند، "توندڕۆكانی كریستیانی" لە ئەوروپا ئامادەن لە پێناو بەدەستهێنانی دەنگی زۆرتر لە هەڵبژاردنەكاندا "دژایەتی" ئاینی ئیسلام و مسوڵمانان بكەن.

وەكو ئۆغڵو ئاماژەى پێ دەكات، بەشێك لە ئەوروپایییەكان بەپێی بەرنامەی سیاسیی خۆیان هەوڵ دەدەن "دژایەتیكردنی" ئیسلام و مسوڵمان وەكو كارتێك بەكار ببەن و لە هەڵبژاردن و كارە سیاسییەكاندا سوودی لێ وەربگرن، بەپێی سەرچاوەكە.

سەرۆكی ڕێكخراوی كۆنفرانسی ئیسلامی ئاماژەى بەبڕیاری حكوومەتی سویسرا كرد لەبارەى قەدەخەكردنی دروستكردنی منارە لەو وڵاتە و ئەو پێشهاتەى بەهاتنە ئارای قۆناخێكی نوێی نیگەرانییەكان و "دوژمنایەتی ئیسلام لە ئەوروپا" هێنا ناساندن.

هەژیی گۆتنە، 29ی تشرینی دووەم/نۆڤێمبەری ڕابردوو لە سویسرا ڕاپرسییەك لەبارەى یاساخكردنی منارەی مزگەوتەكان بەڕێوە چوو، دواتر ئەنجامەكان بەڕەسمی هاتنە ڕاگەیاندن كە 57.5% خەڵكی سویسرا دژی بوونی منارە و دەنگی بەرزی مزگەوتەكانن.

(ئاكانیوز) هـ ب